Bekende kameelperd dood
2010-11-11 11:00
Volksblad
Johannesburg - ’n Suid-Afrikaanse kameelperd wat bekendheid op Britse televisie verwerf het, is die afgelope week begrawe op die plek waar ’n weerligstraal hom doodgeslaan het.
Hamley was gereeld te sien in die ITV-dramareeks Wild at Heart wat op die Glen Afric-wildreservaat naby Hartbeespoort verfilm word.
Volgens Vicky Brooker, dierebestuurder by die reservaat, was daar verlede Vrydag ’n storm op die reservaat.
Die sesjarige Hamley het naby die ingangshek gestaan toe ’n weerligstraal hom tref.
“Veiligheidswagte het gesien hoe Hamley op die plek dood neerslaan.”
Hy is Sondag begrawe waar hy geval het.
“Ons het aanvanklik daaraan gedink om sy vel te bêre, maar eindelik besluit om hom volledig te begrawe,” het Brooker vertel.
“Ons wil ’n seremonie vir hom hou wanneer ons ’n gedenksteen oprig.”
Volgens Brooker het die Britse rolprentspan wat juis nou weer vir die verfilming van die reeks in Suid-Afrika is, ook ’n nagwaak vir Hamley gehou.
“Een van die hoofrolspelers, Stephen Tompkinson, het minute voordat Hamley doodgeslaan is nog oudergewoonte aan hom gevryf voordat hy by die hek uit is.”
Volgens Brooker was Hamley ’n besonderse dier. “Toe hy gebore is, het ons ’n droogte gehad. Ons het hom en sy ma nader aan die mense toegelaat ter wille van beter weiding. Hamley het baie mak geword. Hy het soveel karakter gehad. Almal was net lief vir hom. ”
Brooker het gesê wilde diere wat soos Hamley mak word, kan soms baie gevaarlik wees, maar hulle het niks daarvan in Hamley gesien nie.
“Hy was ongelooflik saggeaard, lieftallig en so- siaal. Hamley was mal oor die kamera – dit was altyd meer van ’n gesukkel om hom van die stel af te kry as om hom op te kry!
“Hy het daarvan gehou om te pronk en was in sy element voor die kameras.”
Brooker se selfoon het sedert Hamley se tragiese dood nie ophou lui nie.
“Ons is so dankbaar vir al die boodskappe van Suid-Afrika en oorsee.”
Hamley se Facebook-profiel wemel ook van boodskappe van medelye.
Volgens Brooker kan die teenwoordigheid van baie dolomietsteen in hul reservaat moontlik die voorkoms van weerlig verhoog, maar is kameelperde besonder kwesbaar omdat hulle so lank is. “Ons het ook al ’n baba-olifantjie hier weens weerlig verloor.”
Die Wild at Heart-reeks het in Januarie 2006 begin. Dit handel oor ’n Britse veearts wat saam met sy gesin na Suid-Afrika kom om ’n natuurreservaat te begin. Die sesde seisoen van die reeks word tans verfilm. “Die span kom so een keer per jaar vir ’n paar maande na Suid-Afrika om te verfilm,” het Brooker gesê.
- Volksblad