Bedrieërs maak R2 milj. uit internet-slenter

2013-02-20 10:37

Bangkok – Die polisie in Thailand het vier mense in hegtenis geneem op aanklagte dat hulle vroue op Facebook en ander sosiale netwerke met beloftes van romanse genader het en dan hulle geld gesteel het, het nuusberigte Woensdag gelui.

Die verdagtes is drie Nigeriese mans en ‘n Thaise vrou.

Die verdagtes is daarvan aangekla dat hulle agt miljoen baht (sowat R2,4 miljoen) van 18 vroue gesteel het voordat hulle Maandag in ‘n woonstelgebou in Bangkok in hegtenis geneem is.

Die Nigeriërs het hulle as ryk, aantreklike Amerikaanse en Europese mans voorgedoen. Hulle het vals foto’s op sosiale netwerke gelaai, het lt.genl. Panu Kerdlarppol gesê.

Hulle het van 'n maand tot 'n jaar met hul slagoffers op die internet gepraat om die vroue te oortuig hulle is lief vir hulle, het Panu gesê.

Die mans sou dan aan die slagoffers sê hulle het waardevolle items as geskenke aan hulle gestuur, waarna hulle vervalste fakture van die duur items vir die vroue oor die sosiale netwerke sou wys.

Die Thaise medepligtige sou gevolglik as ‘n regeringsbeampte optree en aan die slagoffer sê hulle moet doeanebelasting betaal om die items te ontvang.

Die slagoffers is aangesê om die geld via ‘n bankoordrag te betaal.

Die bende bestaan volgens Panu uit 70 lede. Die groep se leier is glo in Maleisië gebaseer.

– Volg Nuus24 op Twitter

- Sapa-DPA