Bedreigde spesie kry twee bondeltjies by
2010-07-22 14:53
Parys – Dit gaan goed met die twee wolkluiperdjies (Neofelis nebulosa) wat twee maande gelede in die Jardin des Plantes-dieretuin hier gebore is.
Die spesie, wat natuurlik in Suidoos-Asië voorkom, is hoogs bedreig. Baie min is bekend oor hulle en hulle teel moeilik aan in gevangenskap.
Luang, wat oorspronklik van die Howletts-dieretuin in Brittanje kom, het op 14 Mei geboorte gee aan Parti en Jaya. Hul pa is Samar, wat van Praag af Parys toe gekom het.
“Dit lyk ná twee maande of hulle (Parti en Jaya) stabiel is,” het Mathieu Dorval, ’n beampte by die dieretuin, gesê. “Hulle het soos verwag gewig aangesit.
Daar is nog net sowat 10 000 wolkluiperds in die natuur oor, en daar is 40 in 13 verskillende dieretuine in Europa.
- Sapa - AFP