Bedgoggas word weer wakker
2011-01-20 13:31
Washington - Wetenskaplikes het die bedgogga behoorlik uit sy snoesige kol geruk en presies gekyk hoe dié lastige wesentjie aanmekaar gesit is.
Die ontleding van die outjies se samestelling het navorsers gelei na verdagtes wat die goggas immuun maak teen selfs uiters sterk gifstowwe.
Die bloedsuiende goggas dra darem nie ernstige siektes oor nie, maar die gejeuk en gekrap kan ´n pes raak.
“Bedgoggas se oplewing is ´n groot probleem. Hulle vervuil tans beddens wêreldwyd,” het navorsers van die Ohio State-universiteit in die Library of Science joernaal PLoS ONE geskryf.
Die jeukmakertjies beleef glo ´n oplewing in digbewoonde stede soos New York en Parys, ´n sowat vervyfdubbeling.
Mens kan hulle glo ook van jou bure erf. Die ruil van meubels en selfs internasionale reis kan die kewers versprei, het navorser Xiaodong Bai van die Cimex lectularius-gogga gesê.
Hul studie is gemik om die gene wat die goggas uiters sterk teen gifstowwe maak te vind. Omprakash Mittapalli, ´n medenavorser, het gesê “die soektog na die gene sal dit moontlik maak om bedgoggas in die toekoms beter te kan beheer.”
Volg Nuus24 op Twitter.
- Reuters