Beampte in sop oor YouTube-video
2012-01-11 12:10
Bangkok – 'n Doeane-beampte van Thailand is gedemoveer nadat 'n video op YouTube gewys het hoe hy 'n sekuriteitsbeampte op die lughawe aanrand.
Beeldmateriaal van 'n kringtelevisiekamera by Bangkok se Suvarnabhumi lughawe wys hoe die beampte deur 'n sekuriteitspunt beweeg en weier om deursoek te word. Op die video kan daar gesien word hoe hy die sekuriteitsbeampte teen sy ore slaan.
Die beampte wys dan na sy naamplaat waarna die junior beampte buig om verskoning te vra.
Die video wat Maandag op YouTube geplaas is, is teen Dinsdag deur meer as 5 000 mense gekyk wat woedende kommentaar gelewer het.
Volgens direkteur-generaal Somchai Poolsavasdi van die doeane departement is die beampte intussen gedemoveer en verrig tans kantoorwerk terwyl 'n ondersoek oor sy gedrag tans aan die gang is.
Die departement het slegs die beampte se eerste naam, Sombat, bekendgemaak.
– Volg Nuus24 op Twitter.
- Sapa - AP