Base en honde skenk bloed
2011-11-24 09:19
Johannesburg – Mens en dier het gister vir die eerste keer in Suid-Afrika terselfdertyd bloed geskenk.
Die Super Hero-bloedbank by die Atterbury-voël-en-dierehospitaal in Menlopark, Pretoria, het die honde se bloed getrek, terwyl ’n mobiele eenheid van die Suid-Afrikaanse Nasionale Bloeddiens die honde-eienaars se bloed getrek het.
“Met die feestyd om die draai is die nood vir bloed vir mense en diere baie groot,” het Louise Peck, organiseerder van die bloedskenkdag, gesê.
Joe, ’n sesjarige Amerikaanse veghond, het nie ’n bang haar op sy kop gehad toe ’n naald in sy nek gedruk is om bloed te kry nie. Hy skenk gereeld bloed.
Sunette van Aardt, diereverpleegster in die hospitaal, het gesê dis glad nie vir honde seer om bloed te skenk nie.
“Sowat 450 ml bloed word getrek uit hoofaar in die hond se nek. Geen verdowing is nodig vir die sken- king wat sowat tien minute duur nie.”
Volgens Van Aardt is dit net so goed vir honde soos vir mense om bloed te skenk.
“Net soos in mense word nuwe rooi- en witbloedselle en bloedplaatjies in honde gemaak nadat hulle bloed geskenk het.”
Van Aardt het die bloedbank twee jaar gelede saam met Malcolm Peck, veearts van die hospitaal, tot stand gebring.
Van Aardt het gesê die hondebloed word in die Onderstepoort- akademiese dierehospitaal in rooibloedselle en bloedplasma geskei.
“Die rooibloedselle word gebruik vir honde met bosluiskoors. Drie uit vier gevalle waar honde bosluiskoors kry, is ’n bloedoortapping nodig.”
Die plasma word gebruik vir honde wat katgriep het. “Die plasma gee dié honde nuwe krag.”
Honde kan elke ses tot agt weke bloed skenk. Een hond se bloed kan drie honde se lewe red.
Enigiemand wat belangstel om hul hond as bloedskenker te registreer kan 012 348 5712 bel.
– Volg Nuus24 op Twitter.
- Beeld