Banke in SA is eerder bruin as groen – verslag
2011-12-01 09:02
Durban – Nedbank, Suid-Afrika se sogenaamde “groen bank”, het gister by COP17 onder skoot gekom oor sy aggressiewe reklameveldtog waarmee hy “voorgee hy is koolstofneutraal”.
Nedbank en die Wêreldnatuurfonds (WWF) het in 2009 ’n gesamentlike projek begin om dié bank se koolstofvoetspoor uit te wis.
Dit het egter misluk omdat Nedbank steeds een van Eskom en verskeie mynhuise se grootste finansiers is, het Bobby Peek, uitvoerende hoof van groundWork, ’n Suid-Afrikaanse nieregeringsorganisasie (NRO), gister by die bekendstelling van die verslag “Bankrolling Climate Change” gesê.
“Nedbank is besig om sy kliënte om die bos te lei met sy groen reklameveldtogte,” het Peek gesê.
Navorsing deur ’n netwerk NRO’s – waaronder Banktrack, Earthlife Africa, groundWork en ungewald – het aangetoon Nedbank het die laaste paar jaar €86 miljoen (sowat R946 miljoen) in koolstof-intensiewe nywerhede belê.
Standard Bank is dié bank in Suid-Afrika wat die meeste geld – €99 miljoen (meer as R1 miljard) – in koolstof-intensiewe nywerhede belê het. Standard Bank is Eskom se grootste finansiële ondersteuner, het Peek gesê.
Heffa Schücking van ungewald het gesê die NRO’s het ’n onafhanklike maatskappy aangestel om die banke se sake te ondersoek. Die maatskappy het onder meer banke en steenkool- en oliemaatskappye se jaarverslae bestudeer. In die jaarverslae moet maatskappye aantoon van wie hulle finansiering ontvang.
“Die meeste van die banke wat steenkool- en oliemaatskappye finansier, neem buitengewone sterk standpunte oor klimaatsverandering in,” het sy gesê.
Peek het gesê die koalisie van NRO’s gaan dié studie nou gebruik om die burgerlike gemeenskap te beïnvloed om óf hul geld na ander, etiese banke te skuif óf om banke te dwing om geld aan die koolstof-intensiewe nywerhede te onttrek en dit in hernubare bronne te belê.
Schücking het gesê banke is kwesbaar en besef dat die openbare mening van onskatbare belang vir hul voortbestaan is.
Die grootste ondersteuners van steenkoolmyne en olieraffinaderye is onder meer JP Morgan Chase, Citi, Deutsche Bank, Bank of America, Royal Bank of Scotland, HSBC en Barclays. In Suid-Afrika is dit Standard Bank en Nedbank.
– Volg Nuus24 op Twitter.
- Die Burger