Baie lae gety ontbloot skaars fossiel
2011-08-02 08:05
Anchorage – Die fossiel van ’n skaars dinosourus wat soos ’n groot akkedis gelyk en in die see geleef het, is vroeër vanjaar toevallig tydens ’n besonder lae gety deur geoloë op ’n strand in Alaska ontdek.
Wetenskaplikes, wat met geologiese opnames besig was, het die fossiel van ’n prehistoriese mariene reptiel, bekend as ’n Thalattosourus, aan die kus van die Tongass-nasionale woud gevind.
Dit is die volledigste fossiel van ’n Thalattosourus wat nog in Noord-Amerika gevind is. Thalattosourus beteken “see-akkedis”.
Dié soort dinosourusse, wat langer as ’n lang man kon raak en lang sterte gehad het, het in die vroeë dae van die dinosourusse in warm, vlak waters geleef en aan die einde van die Triassiese tydperk (sowat 200miljoen jaar gelede) uitgesterf.
“Ons was buite besig om ons eerste koppie koffie te geniet, toe iemand skielik vra: ‘Wat is daai?’” het mnr. Jim Baichtal, ’n geoloog van die Amerikaanse bosboudiens (USFS), oor die ontdekking gesê.
Die fossiel is in Junie opgegrawe en word sedertdien by die Museum van die Noorde by die Universiteit van Alaska in Fairbanks bestudeer om vas te stel of dit ’n nuwe spesie is.
Baichtal het gesê daar is slegs sowat ’n dosyn volledige Thalattosourus-fossiele in die wêreld. Die waarskynlikheid dat dié een ’n nuwe spesie verteenwoordig, is dus “redelik hoog”.
Met dié see-akkedis se afsterwe was die betrokke streek van Alaska naby aan die ewenaar geleë en het dit ’n tropiese klimaat gehad.
“Dit was ’n warm, vulkaniese eiland, baie soos Hawaii,” het Baichtal gesê. “Die Thalattosourus het waarskynlik in die sediment vasgeval en kon nie weer daaruit nie.”
Alle Thalattosourusse het gewebte tone gehad, maar sommige het skerp tande gehad om vis mee te vang, terwyl ander plat tande gehad het om skulpe mee stukkend te pers.
Wetenskaplikes beplan om na die opgrawingsterrein terug te keer om die fossiel se skedel, wat nog nie opgespoor kon word nie, te probeer vind.
– Volksblad
– Volg Nuus24 op Twitter.
- Reuters