‘Babavet’ is gevaarlik, sê kenner
2011-10-12 09:55
Dit is nonsens dat ’n kind sy babavet sal ontgroei – daar moet iets aan gedoen word.
Dié slegte nuus vir diegene wat al by die 30 of ouer trek en steeds glo die “babavet” sal vanself kwyn, kom van Hans de Ridder, direkteur van die skool vir biokinetika, rekreasie en sportwetenskap aan die Noordwes-Universiteit.
Hy was aan die woord tydens ’n lesing wat deur die Suid-Afrikaanse Vereniging van Wetenskapjoernaliste (Sasja) aangebied is.
De Ridder het gesê vir hom is een van die skokkendste syfers dat sowat 17,6 miljoen kinders jonger as vyf jaar wêreldwyd aan vetsug ly.
“Mense lag dit af en sê dit is net babavet.
“Dit is nonsens. Sodra ’n baba begin kruip en loop, moet dié vet verdwyn.
“’n Kind ontgroei ook nie vet nie. Dit is onwaar.
“Die ouer moet iets daaraan doen omdat vetsug ’n ingewikkelde siekte met omgewings- en genetiese faktore is,” het De Ridder verduidelik.
Kinders in Suid-Afrika kyk gemiddeld vier uur per dag televisie en omdat dit onveilig is om buite te speel, word baie selfs toegesluit in hul huise terwyl die ouers by die werk is, het hy gesê.
Die uiteinde van vetsug is kinders wat geboelie en sosiale randfigure word en dit lei tot aggressie, depressie en selfs selfmoord, het De Ridder gewaarsku.
De Ridder het skole gekritiseer wat net aandag gee aan hul eerste en tweede sportspanne.
“Wat van die res?
“Jy is eintlik nie deel van fisieke aktiwiteit as jy nie in dié spanne is nie.
“Sport behoort nie net vir die top-presteerders te wees nie”.
- Die Burger