Babas huil in eie taal
2009-11-06 15:08
Parys - Babas hoor en neem taal in die baarmoeder reeds in, en huil dus van meet af aan in hul eie taal, het onlangse navorsing bevind.
'n Ondersoek na die geluide van Duitse en Franse babas het onlangs getoon dat pasgebore kleingoed se geluide nie so universeel is soos voorheen vermoed nie.
Navorsing het al vroeër bewys dat 'n menslike fetus teen die derde trimester van 'n swangerskap klanke uit die buitewêreld, veral musiek en spraak, memoriseer. Maar selfs al kon hulle die verskille tussen toonhoogtes en stemme uitken, was dit nie bekend dat babas dié verskille verbaal kon uitspreek nie.
Die Duitse en Franse navorsingspan, onder leiding van Kathleen Wermke van die Wurzburg-universiteit in Duitsland, het egter dié aanname verkeerd bewys.
Wermke en haar span het die klanke van 60 gesonde babas tussen die ouderdomme van drie en vyf dae opgeneem en ontleed.
Helfte van die babas het aan Duitse families behoort en die ander helfte aan Franse gesinne.
Volgens die navorsing, wat in die November-uitgawe van die Amerikaanse tydskrif Current Biology gepubliseer word, was dit duidelik dat die toon en melodie van die babas se gehuil deur hul ma's se taal, oftewel hul moedertaal, beïnvloed is.
Pasgebore Franse babas se toon styg wanneer hulle huil, terwyl Duitse babas met 'n dalende stemtoon huil, het die studie bevind.
Wermke het Vrydag in 'n verklaring gesê die navorsing beaam hoe belangrik dit is dat babas huil om hul taal te begin ontwikkel.
Die navorsing ondersteun ook die idee dat sekere beperkinge in taalontwikkeling op 'n jong ouderdom moontlik eerder fisies as kognitief van aard mag wees.
- Sapa-AFP