Baba dood weens aanlyn-speletjies
2011-02-25 12:44
Taipei – ’n Jong Taiwannese egpaar is daarvan beskuldig dat hulle hul babadogtertjie van honger laat sterf het omdat hulle obsessief geraak het oor die speel van aanlyn-speletjies en vergeet het om haar gereeld te voer, het polisie Vrydag gesê.
Die eenjarige het slegs 4 kg geweeg, of helfte van die algemene gewig van ’n dogter van soortgelyke ouderdom, toe die egpaar haar dood vroeër hierdie week aangemeld het, het polisie gesê.
Volgens die plaaslike Apple Daily-koerant, was die dogtertjie “vel en been met versonke oë” toe polisie op die toneel verskyn het, terwyl ’n speletjie-webtuiste op die monitor langs haar krip geflikker het.
Aanklaers sal die oorsaak van die meisie se dood ondersoek om te bepaal of haar ouers, wat in hulle vroeë twintigerjare is, verantwoordelik was. Hulle mag tot twee jaar in die tronk in die gesig staar vir strafbare manslag.
Volg Nuus24 op Twitter.
- AFP