Baba-dolfynsterftes styg langs die Golfkus
2011-02-23 13:50
Biloxi, Mississippi - Marienewetenskaplikes ondersoek die dood van 26 babadolfyne wat langs die Amerikaanse Golfkus uitgespoel het, meestal sedert verlede week, het navorsers gesê.
Die skrikwekkend hoë aantal dooie jong dolfyne word as ’n moontlike gevolg van die BP-olieramp in April verlede jaar ondersoek.
’n Beraamde 5 miljoen vate olie is oor meer as drie maande in die Golf van Mexiko gemors.
Die lyke van 26 baba en doodgebore dolfyne is sedert 20 Januarie op eilande, in moerasse en op strande langs die kus tussen Oos-Louisiana en die Golfkus in Alabama gevind, het amptenare gesê.
Dit is meer as tien maal die getalle wat normaalweg in hierdie areas gedurende hierdie tyd van die jaar uitspoel.
Dit is tans kalfseisoen vir sowat 2 000 tot 5 000 dolfyne in die streek, het die direkteur van die Instituut vir Marienesoogdier Studies in Gulfport, Moby Solangi, gesê.
Meeste van die karkasse, wat sowat 1 m in lengte is, is tydens die afgelope week gevind, waar hulle meestal in Mississippi en Alabama voorgekom het.
Die oorblyfsels van sowat 10 volwasse dolfyne, nie een van hulle swanger wyfies nie, is ook tot dusver hierdie jaar gevind.
“Wat dit eienaardig maak is dat die dolfyne oor so ’n groot area versprei is,” het Solangi gesê.
Dolfyne wat olie op die water se oppervlak teëkom sal ernstige gesondheidsgevolge in die gesig staar, het Solangi gesê.
Gedokumenteerde sterftes onder die volwasse dolfynbevolking van die Golfkus het ongeveer verdriedubbel in vergelyking met verlede jaar.
Van sowat 30 in ’n gegewe jaar na 89 in 2010, het Solangi gesê.
Volg Nuus24 op Twitter.
- Reuters