Australië lugtig vir omgewingsimpak van groot vistreilers

2012-11-19 15:44

Sydney – 'n Verbod op groot vistreilers sal die volgende twee jaar in die suidelike waters van Australië geld weens onsekerheid oor die impak wat grootskaalse vissery op spesies soos robbe en dolfyne het.

Dit sal die operateurs van die omstrede treiler Abel Tasman effektief verhoed om met grootskaalse bedrywighede in die gebied te begin.

Tony Burke, minister van omgewingsake, het in September besluit om die Abel Tasman 60 dae lank te verhoed om in die gebied te begin visvang, omdat genoeg navorsing nie in daardie stadium gedoen is nie. Daar was ook groot openbare protes teen die Abel Tasman se beplande aktiwiteite.

Burke het Maandag die verbod verleng.

"Die onsekerheid oor die moontlike gevolge is nog te groot," het Burke in 'n mediakonferensie gesê.

Voorstanders van die visserybedryf glo egter die vrese is ongegrond, omdat dié soort vistreilers net 10% van die beskikbare vis sal kan vang, wat 'n klein impak op die ekosistelsel sal hê.

– Volg Nuus24 op Twitter

- Sapa - AFP