Aussies maak superrekenaar-deurbraak

2012-09-20 09:35

Sydney – 'n Australiese navorsingspan het Donderdag gesê hulle het 'n groot tegnologiese deurbraak gemaak in die wedloop om 'n kwantum-superrekenaar te skep wat 'n revolusie in die rekenaarbedryf teweeg kan bring.

Ingenieurs van Sydney se Universiteit van Nieu-Suid-Wallis het gesê hulle het die eerste werkende kwantum-bis – 'n kwantum- binêre syfer, oftewel die kleinste werkende eenheid van 'n kwantum-rekenaar – geskep.

Die groep se bevindings is in die jongste weergawe van die joernaal Nature gepubliseer.

Andrew Dzurak, die hoofnavorser, sê die span het 'n mikrogolfveld gebruik om beheer te verkry oor 'n elektron wat verbind was aan 'n enkele fosfor-atoom wat aan 'n silikoontransistor gekoppel was.

Die span kon inligting skryf en lees deur die elektron se magnetiese oriëntasie te gebruik, wat volgens Dzurak 'n "belangrike stap in die rigting van 'n silikoon-kwantumrekenaar gebaseer op enkele atome" is.

– Volg Nuus24 op Twitter.

- AFP