Aus: Facebook-gier 'planking' kos man sy lewe
2011-05-17 08:31
Sydney – Is ‘n snaakse foto wat aanlyn-vriende sal beïndruk genoeg om jou lewe te waag?
Só vra die Australiese polisie na ‘n man Sondag dood is toe hy aan ‘n nuwe Facebook-gier deelgeneem het – “planking.”
Acton Beale (20) het homself doodgeval toe hy homself wou posisioneer op ‘n balkon, sewe verdiepings bo ‘n Brisbane-strate.
“Plankers” lê op hul mae met hul hande styf langs hul sye om soos 'n stuk hout doodstil te lê.
Min was bekend oor “planking” voor ‘n man verlede week aangekla is na hy só op ‘n polisiemotor gaan lê het.
Intussen het die 10 000 lede op die Planking Australia-blad op Facebook gegroei tot 100 000 lede terwyl daar nou ook Planking USA-, Planking UK-, Planking France- en Planking Germany-blaaie geskep is.
Die polisie is egter bang die foefie raak buite beheer.
“Ons het nie ‘n probleem met ‘planking’ nie,” het die adjunk-polisiekommissaris Ross Barnett gesê.
“As mense dit sewe verdiepings hoog doen en hul lewe in gevaar stel, raak ons egter bekommerd,” het hy bygelas.
Sam Weckert, die stigter van die Australiese Facebook-blad, het ontken hulle moedig gevaarlike “planking” aan.
“Ons het daarmee begin as ‘n oulike tydverdryf,” het hy gesê.
“Ons wil ‘plankers’ en die media aanraai om nie ‘n sensasieverhaal van die tragedie te maak nie.”
Videos en foto's van "planking" is gewild onder deelnemers en word op sosiale netwerke en webblaaie gedeel.
Kyk hier na 'n video van "planking".
Volg Nuus24 op Twitter.
- AFP