Asemtoetser ná verbeterings weer ingespan
2011-10-17 09:42
Kaapstad – Die omstrede Dräger-asemtoetser sál ná verbeterings weer gebruik word om dronkbestuurders vas te trek.
Die Wes-Kaapse minister van vervoer en openbare werke, Robin Carlisle, het ’n brief van sy nasionale ampsgenoot, Sibusiso Ndebele, aan die media uitgereik waarin laasgenoemde die gebruik van dié asemtoetser steun.
Regter Nathan Erasmus het verlede maand in die Wes-Kaapse hooggeregshof beslis die Dräger-toestel, ’n asemtoetser wat in Duitsland vervaardig is, se kalibrasie en verifiëring moet noukeurig verbeter word.
Slegs ’n bloedtoets sal voorlopig wettiglik aanvaar word wanneer mense vir dronkbestuurtoetse afgetrek word, het Erasmus bevind.
Die toetssaak om die betroubaarheid van die Dräger-asemtoetser te bepaal is in Junie voor Erasmus aangehoor.
Dit het slegs betrekking op sake in die Wes-Kaap.
Ndebele het in sy brief geskryf die nodige veranderinge aan die toestel sal so gou en deeglik as moontlik aangebring word.
“Sodra dit voltooi is, is daar geen wegkruipplek meer vir dronkbestuurders nie,” het Ndebele geskryf.
Hy het Erasmus ook vir sy uitspraak geloof en meen dit gaan ’n stewige grondslag lê vir geregtigheid wat padveiligheid betref.
“Diegene wat gevang word dat hulle bestuur terwyl hulle oor die wettige alkoholperk is en probeer om geregtigheid te ontduik, sal nie troos in dié uitspraak vind nie,” het hy bygevoeg.
– Volg Nuus24 op Twitter.
- Volksblad