Apple-verkope skiet die hoogte in
2011-10-19 09:06
New York – Daar is groot verwagtinge van die Apple-maatskappy nadat iPhone-verkope rekords gebreek het, maar Wall Street is vol vertroue dat die wêreld se grootste tegnologie-maatskappy nie gaan teleurstel nie en weereens ’n goeie kwartaal gaan lewer.
Beleggers wat bekommerd is oor wêreldwye dalende verkope, donker ekonomiese vooruitsigte en die vinnige uitbreiding van Google se Android- mobiele sagteware het ’n bietjie ontspan nadat 4 miljoen iPhone 4S eenhede in drie dae verkoop is – meer as dubbel dié van sy voorgangers – ten spyte van ’n louwarm ontvangs in die media.
Apple se aandeelhouers het baie gehad om oor bekommerd te wees sedert Augustus toe Steve Jobs die leisels aan Tim Cook oorhandig het.
Die maatskappy het sy groot visionêre leier en mede-stigter verloor toe Jobs op 5 Oktober dood is. Sommige ontleders sê die onderbreking het ’n klein venstertydperk vir die kompetisie soos Google en hul Android-vennoot, Samsung, gebied om ’n voet in die deur te kry.
Maar Apple gaan ’n positiewe kort-termyn prentjie wys wanneer dit vandag die oorweldigende verkoopsyfer vir Julie tot September van sy nuwe iPhone en iPad onthul. Channing Smith, mede-bestuurder van die groeifonds wat Apple-aandele besit, sê daar word nou op die vakansietydperk gefokus.
“Ons verwag Apple om hierdie Kersseisoen deur die dak te gaan”, sê hy. Daar is nietemin kommer oor toekomstige kompetisie in die mark - veral vanaf Microsoft en Nokia, asook oor die vinnig-groeiende Android-mark. Ander is bekommerd dat Apple se aandeelprys dalk té vinnig te hoog gestyg het.
– Die Burger
– Volg Nuus24 op Twitter.
- Reuters