Apple betaal dalk R18 milj oor 4G-advertering

2012-06-08 14:32

Sydney – Die Amerikaanse tegnologiereus Apple het Vrydag ingestem om 'n boete van Aus$2,25 miljoen (sowat R18 miljoen) te betaal nadat hy Australiese gebruikers oor die plaaslike 4G-geskiktheid van sy iPad mislei het.

Australië se Mededingings- en Verbruikerskommissie (ACCC) het Apple hof toe gesleep oor misleidende advertering oor sy "iPad met WiFi en 4G"-promosie omdat die gewilde tablettoestel nie op die plaaslike 4G-frekwensie werk nie.

Die verbruikerskommissie het aan die federale hof gesê Apple het ingestem om die boete te betaal.

Apple het in Maart aangebied om 'n advertensie te plaas oor die iPad se funksies en Australiese klante, wat voel hulle is deur die "iPad met WiFi + 4G"-promosie mislei, te vergoed.

Hoewel die iPad se 4G-funksie slegs op netwerke in Amerika en Kanada werk, is dit bemark as 'n funksie wat regoor die wêreld werk. Volgens die ACCC kom dít neer op misleidende advertering.

Die tabletrekenaar word nou buite Noord-Amerika as "Wi-Fi+Cellular" bemark met 'n duidelike boodskap op Apple se Australiese webwerf dat die toestel nie op die 4G-frekwensie in dié land werk nie.

Apple het ingestem om buite die hof te skik en die boete sowel as die kommissie se regskostes te betaal.

Die maatskappy het ook ingestem om teen 13 Junie 'n vertroulike brief, met 'n finale besluit oor die boete en skikking van die saak, aan die regter te verskaf.

– Volg Nuus24 op Twitter

- AFP