Apple-baas se vergoeding daal skerp
2012-12-28 10:33
New York – Tim Cook, hoof- uitvoerende beampte van Apple, se totale vergoeding vir 2012 sal daal van $378 miljoen (sowat R3,2 miljard) verlede jaar tot $4,2 miljoen (sowat R35 miljoen), lui 'n dokument wat Donderdag vrygestel is.
Die tegnologiereus het in 'n regulatoriese dokument gesê 'n salaris van $1,4 miljoen (sowat R11 miljoen) en 'n bonus van $2,8 miljoen (sowat R23 miljoen) is by die bedrag ingesluit.
Dit is baie minder as wat ander hooggeplaaste beamptes van die maatskappy in die sak sal steek.
Peter Oppenheimer, hoof- finansiële beampte, sal $68,8 miljoen (sowat R584 miljoen) ontvang, Bob Mansfield, senior adjunkpresident van tegnologieë, kry $85,5 miljoen (sowat R726 miljoen) en Bruce Sewell, ook 'n seniorbeampte, kry $69 miljoen (sowat R586 miljoen).
Cook se vergoeding het verlede jaar 'n bonus van sowat R3,2 miljard, in die vorm van aandele ingesluit. Dié bedrag word verbind met sy benoeming vir die toppos in die maatskappy voor die dood van Steve Jobs in Oktober 2011.
– Volg Nuus24 op Twitter
- Sapa - AP
