Apple, Samsung wéér hof toe

2012-09-01 20:11

New York – Die tegnologiereus Apple het 'n nuwe saak in 'n hof in die VSA teen sy Suid-Koreaanse mededinger Samsung geopen waarin hy beweer dié maatskappy trek stééds voordeel uit sommige van sy patente.

Die nuwe aanklagte is in San Jose, Kalifornië aanhangig gemaak kort na 'n Amerikaanse hof beslis het Samsung moet skadevergoeding van meer as $1 miljard (ongeveer R8,4 miljard) aan Apple betaal.

"Ten spyte van daardie hofsaak oorstroom Samsung steeds die mark met produkte soortgelyk aan ons s'n," het Apple gesê, en vier van Samsung se onlangse produkte – insluitend die nuwe Galaxy S III-slimfoon – by die lys van produkte gevoeg wat hy van rakke in die VSA wil laat verwyder.

"Apple sal geweldige skade ly, en ly tans skade" as gevolg van die ignorering van sy patenteregte, het die maatskappy agter die gewilde iPhone en iPad gesê.

– Volg Nuus24 op Twitter.

- Sapa - AFP