Almal wil vir Paul hê
2010-07-16 12:08
Kaapstad – ‘n Bieëry het rondom die wêreld se gunsteling seekat, Paul, losgebars, met Spanje voor in die koor om dié sokker-ster se aftrede te akkommodeer.
Die dieretuin in Madrid het aangedui dat hulle baie graag vir Paul die Seekat wil huisves ná hy met absolute akkuraatheid voorspel het dat Spanje die Wêreldbeker sal wen.
Paul is veronderstel om nou uiteindelik af te tree en dit wil voorkom asof Spanje die verkose land sal wees.
'n Dieretuin in die hoofstad Madrid het hom voorgeneem om enige bod op die seekat van 'n ander dieretuin te troef.
Die presiese bedrag wat Spanje bereid is om vir die seekat te betaal, is egter nie bekend nie.
Intussen het ‘n woordvoerder van Sea Life, die akwarium in Duitsland waar Paul tans woon, gesê dat die seekat hoegenaamd nié te koop is nie.
“Ons is glad nie in kontak met die dieretuin in Madrid nie en is glad nie van plan om ons seekat vir ‘n ander dier te ruil nie,” het Tanja Munzig van Sea Life gesê.
Volg Nuus24 op Twitter.
- SAPA