Agt aangekla oor internet-seksvideo
2010-07-05 15:00
Djakarta, Indonesië - Die polisie in Indonesië het Maandag gesê hulle gaan agt verdagtes aankla oor 'n seksvideo-skandaal waarby bekendes betrokke is.
Ito Sumardi, hoofspeurder, wou nie die name van die verdagtes bekend maak nie, maar sê die modelle en TV-persoonlikhede Luna Maya en Cut Tari, wat glo saam met die rockster Nazril Ariel in die videos verskyn, is nie op die lys van verdagtes nie.
Ariel, die sanger van die plaaslike popgroep Peterpan, is in hegtenis geneem op aanklag dat hy die anti-pornografie wet verontagsaam het. Hy bly in aanhouding tot die verhoor.
Sumardi het gesê die agt ander verdagtes het die twee eksplisiete videos op die internet gelaai en 'n nasionale skandaal ontketen.
Indien hulle skuldig bevind word, kan hulle ses jaar tronkstraf en 'n boete van $110 000 (sowat R850 000) opgelê word.
Volg Nuu24 op Twitter
- Sapa - AP