AfriForum: 'Ja vir handel in renosterhorings'
2012-05-03 15:04
Kaapstad – AfriForum het Donderdag 'n aankondiging dat die departement van omgewingsake dit oorweeg om die internasionale gemeenskap te nader met ’n voorstel om die handel in renosterhoring te wettig, verwelkom.
Edna Molewa, minister van omgewingsake, het vroeër aangekondig dat haar departement dié stap oorweeg as 'n moontlike manier om renosterstropery te bekamp.
"AfriForum steun die beginsel dat handel in renosterhoring gewettig moet word om renosterstropery hok te slaan," het Julius Kleynhans, AfriForum se hoof van omgewingsake, in 'n verklaring gesê.
Kleynhans het gesê hy sien dit as die enigste manier om die spesie van uitwissing te red.
“Sedert die begin van die jaar is 200 renosters reeds deur stropers doodgemaak in Suid-Afrika. Suid-Afrika het ’n geraamde 20 ton-voorraadopgaring van renosterhoring. Ons moet die mark oorstroom,” het Kleynhans gesê.
“Die prys van renosterhoring word op meer as R500 000 per kilogram geraam. Indien ons die mark oorstroom, sal dit pryse afdwing en die risiko van renosterstropery verhoog. Befondsing vir die bekamping van renosterstropery sal ook toeneem,” het Kleynhans gesê.
Die 16de kongres van die Konvensie oor Internasionale Handel in Bedreigde Spesies (Cites) vind Maart volgende jaar in Bangkok, Thailand plaas. Die besluit oor die handel in renosterhorings kan by dié geleentheid hersien word.
– Volg Nuus24 op Twitter.
- Nuus24
