Acer stel óók mini-tabletrekenaar bekend

2013-01-09 14:17

Taipei – Die Taiwanse rekenaarvervaardiger Acer het Woensdag gesê dat hy ook ‘n mini-tabletrekenaar sal vrystel vir $99 (sowat R900).

Die 18 cm lange Iconia B1-tabletrekenaar sal vir dié promosionele prys in Asië en Suid-Amerika verkoop word.

Dit is nog nie bekend wanneer die toestel beskikbaar sal wees nie.

‘n Woordvoerder vir Acer het bygevoeg dat die tabletrekenaar teen $129 (sowat R1 100) in ander lande verkoop kan word.

Dit beteken dat die toestel goedkoper is as Google se Nexus 7 en Amazon se Kindle Fire, twee van Acer se mededingers in die mini-tabletrekenaarmark.

Acer het onlangs die tabletrekenaar-mark betree omdat die vraag na gewone rekenaars afneem namate die gewildheid van tabletrekenaars toeneem.

– Volg Nuus24 op Twitter
 

- Sapa-DPA