'Aardverwarming' rede vir hittegolf
2012-02-07 08:05
Marelize Barnard en Yaël Malgas
Kaapstad – Die hittegolwe en uitermatige storms wat die Wes-Kaap die laaste tyd teister, is waaroor aardverwarming gaan – al hoe meer uitermatige weersomstandighede met hoër maksimum-temperature.
En dié mense wat Maandagoggend se geklap van donderweer en blitse in die Skiereiland ná ’n naweek van hitte ervaar het, sal kan saampraat.
Dié klein donderstorm se meegaande weerlig het veral oor hoogliggende gebiede, soos Leeukop, Vlaeberg en Tafelberg, geflits.
Die storm het omstreeks 06:50 van Kampsbaai af oor Kloofnek getrek en die weerlig het motoralarms laat afgaan. Die storm was die gevolg van warm toestande en ’n laagdrukstelsel wat uit die Weste oor die see beweeg het. Die weerlig het ’n harde bui reën voorafgegaan.
Later gister het die temperature in Kaapstad tot 34°C gestyg en op Robertson het dit teen 14:00 reeds 42°C bereik.
Dié tweede hittegolf wat die Wes-Kaap binne drie weke getref het, is ’n aanduiding dat temperature aan die styg is, volgens dr. Peter Johnston, navorser by die Universiteit van Kaapstad (UK) en deel van die Climate Systems Analysis Group (CSAG) by dié universiteit.
Volgens Johnston strook temperature, soos Sondag se 38,1°C in die stadskom, met die projeksies van hoër temperature wat voorlê. “Dit is presies waaroor aardverwarming gaan.”
Die CSAG voorspel dat somertemperature in Suid-Afrika teen 2050 tussen 2°C aan die kusgebied en 3°C in die binneland gaan styg. “Mense kan al hoe meer uitermatige weer verwag met verhoogde gemiddelde temperature én hoër maksimum-temperature,” het hy gesê.
Die jongste hittegolf raak veral uitvoerders in die sagtevrugtebedryf.
“Dit is baie meer uitdagend vir boere om by hul skedules te hou,” het Carl Opperman, uitvoerende hoof van Agri Wes-Kaap, gesê.
“Die warm weer laat die vrugte vreeslik vinnig ryp word. Die oes en verkoeling van die vrugte moet dan baie vinniger gebeur.”
Volgens Opperman raak die hittegolf boere dwarsoor die Wes-Kaap. “Mense van Oudtshoorn, De Doorns tot in die Paarl voel die hitte. Ná die vrugte gepluk is, is dit van kritieke belang dat dit so gou as moontlik verkoel word.
“Boere se bedryfskoste is beslis hoër in die warm maande, omdat meer elektrisiteit en water vir verkoeling gebruik moet word,” het Opperman gesê.
Volgens Rian Smit, weervoorspeller van die Kaapse weerkantoor, sal dit vandag koeler wees.
Ná 'n bloedige warm naweek het Kapenaars Maandagoggend in die middel van 'n donderstorm wakkergeskrik.
– Volg Nuus24 op Twitter
- Die Burger