Aanlyn-begraafplaas help met grondtekort
2009-12-31 10:49
Hongkong - Amptenare in Hongkong is besig om 'n aanlyn-begraafplaas te skep om te help om dié stad se tekort aan grond vir begraafplase te verlig.
Dié aanlyn-begraafplaas sal aan mense wat nie 'n graf in 'n begraafplaas kan bekom nie, die geleentheid bied om vir hulle afgestorwe geliefdes liedjies, virtuele vrugte en ander geskenke te laat, het die South China Morning Post berig.
Elke rekeninghouer sal 10 megagrepe ruimte ontvang, het die stad se begraafplaasamptenaar, Cheuk Wing-hing, aan die koerant gesê.
Dié stap is een van die maatreëls wat ingestel is om 'n oplossing te bied vir die enorme vraag na grafte in dié stad van 7 miljoen mense – een van die digbevolkste gebiede ter wêreld.
Grafte is soms selfs duurder as luukse eiendomme, en daar is ook 'n tekort aan fasiliteite vir die berging van die as van veraste mense.
- SAPA