ANC span Zuma in op Twitter
2011-04-27 09:27
Kaapstad – Die ANC gaan pres. Jacob Zuma heel moontlik in ’n toenemend fel kuber-verkiesingsveldtog op Twitter inspan.
Jackson Mthembu, die ANC se hoofwoordvoerder, het Dinsdag gesê die staatshoof se verskyning op dié mediaplatform is “baie beslis” in oorweging.
Dit kom nadat die party verlede week sy eerste vraag-en-antwoordsessie aangebied het waarin Mthembu gesê het die ANC glo werklik die DA is ’n rassistiese party wat slegs vir wittes is.
Die ANC is egter ver agter die DA wat digitale media betref: Dié party het reeds vier sulke vraag-en-antwoord-sessies gehou terwyl sy leier, Helen Zille, ook lankal op Twitter bereikbaar is.
Ryan Coetzee, ’n DA-strateeg, het gesê die party se sogenaamde Twitter-stadsaalvergaderings op Sondagaande is ’n belangrike deel van die party se veldtog. “Suid-Afrika is egter nog nie naby aan Amerika nie, waar die media op heeltemal anderste maniere ingespan en gebruik word.”
Volgens hom was die reaksie tot dusver baie goed en het die party ook gunstige terugvoering van mediakenners oor hul aanwending van Twitter gekry. “Die sessies word elke week net groter en diegene wat daaraan deelneem, wissel van mense wat bloot inligting soek tot ondersteuners en kritici.”
Hy het die ANC se eerste poging verlede week gevolg en was nie beïndruk daardeur nie. “Dis belangrik dat regte leiers aan so ’n gesprek deelneem en ook volledige antwoorde, hoewel binne die bestek van 140 karakters, sal gee. So word dit ’n doeltreffende manier om direkte kontak te bewerkstellig en verkry dit geloofwaardigheid as ’n verwysingspunt.”
Mthembu het ook gesê Twitter is ’n belangrike manier om kontak tussen die ANC en kiesers te bewerkstellig.
“Dit is so juis omdat baie mense nie koerante lees nie en dit vir die ANC belangrik is om sy boodskap eerstehands by kiesers te kry.
“In daardie sin speel ons sessies op Twitter ’n ander rol as advertensieborde en TV-, radio- en koerant-advertensies omdat daar direkte kontak tussen die party en sy ondersteuners is.”
Hy het gesê die party se eerste poging verlede week is goed op die kuber-verkiesingslagveld ontvang en dat tydsbeperkings die beantwoording van alle vrae verhinder het.“Ons oorweeg dit baie beslis om Zuma in die toekoms op Twitter in te span,” het Mthembu gesê.
* Volg die ANC se Twitter-profiel by @MyANC terwyl die DA se vraag-en-antwoordsessies by #DAQA gevolg kan word.
Dié party se leier is op Twitter by @helenzille.
En volg Nuus24 hier.
- Volksblad