80% gespanne in SA vakansietyd
2011-12-15 07:31
Johannesburg – Vakansie is ’n tyd vir familie, rus en ontspan, maar vir 80% van Suid-Afrikaners is dit ’n spanningsvolle tyd.
Volgens ’n nasionale opname wat deur ’n farmaseutiese maatskappy gedoen is, het elke 8 uit 10 van die mense wat aan hul opname deelgeneem het, erken hulle is gespanne.
Die grootste oorsaak vir hulle angstigheid is geld, of die gebrek daaraan.
Mense wat in dié tyd weggaan, is ook voor hul reis oor veiligheidsmaatreëls by hul huise gespanne.
Mariska Fouché, ’n woordvoerder van Pharma Dynamics, het gesê die derde grootste rede vir spanning en depressie is verlange na geliefdes wat ver of dood is.
Cassey Chambers, bedryfsdirekteur van die Suid-Afrikaanse depressie-en-angsgroep (Sadag), het gesê die getal oproepe wat hulle in die feestyd ontvang, is min of meer dieselfde as die res van die jaar, maar die redes verskil.
“Vir mense wat alleen is, is dit ’n baie moeilike tydperk. Mense wat onlangs geskei is, ’n geliefde verloor het of ’n traumatiese ondervinding beleef het, vind dié tyd van die jaar besonder moeilik.”
Chambers het gesê dit is veral ouer mense wat spanningsdruk (stres) beleef.
“Hulle word meer bewus van hoe alleen hulle is, veral as hul kinders nie kom kuier nie of in die buiteland woon.”
Intimiteit help mense om spanning beter te hanteer.
Fouché het gesê kliniese studies het bevind paartjies wat hande vashou, het baie laer stresvlakke. “Soentjies en drukkies verminder alledaagse angs. Paartjies wat gereeld soen, is ook minder geneig om aan depressie te lei.”
Nog redes vir angstigheid sluit onder meer in om gaste te onthaal, verblyf vir familie en vriende en Kersinkope.
“Die feestyd is vol pret en partytjies, maar is ook ’n uitdaging vir mense wat oor die algemeen geneig is tot angstigheid.”
Mense wat angstig of depressief voel, kan Sadag se beraders by Pharma Dynamics se gratis inbellyn tussen 08:00 en 20:00 bel by 0800 205 026.
– Volg Nuus24 op Twitter
- Beeld