61 walvisse spoel uit, vrek in NS
2011-11-16 19:38
Wellington – Meer as 60 loodswalvisse is op ‘n afgeleë strand in Nieu-Seeland dood gevind, het amptenare Woensdag gesê.
Toeriste het Maandag by Farewell Spit aan die bopunt van die Suid-Eiland op die 61 gestrande walvisse afgekom, het die departement van bewaring (DOC) gesê.
John Mason, plaaslike bestuurder van die DOC, het gesê ‘n groot hoeveelheid was reeds dood.
Hulle het gehoop dat die oorlewendes Dinsdag met hooggety sal terug beweeg in die water, maar hulle het net weer uitgeswem na die strand.
Teen Woensdagoggend was 18 walvisse nog lewendig en werkers van die DOC het besluit om hulle uit te sit, eerder as hom hulle verder te laat ly.
“Dit is die ergste uitkoms en dit is nie ‘n werk wat ons mense geniet om te doen nie,” het Mason gesê.
Loodswalvisse word tot ses meter lank en is die mees algemene spesie van walvisse wat in Nieu-Seeland voorkom.
Daar is twee tot drie keer ‘n jaar sulke voorvalle waar groot groepe saam op die strand uitspoel.
Wetenskaplikes is nie seker hoekom loodswalvisse so uitspoel nie, maar hulle spekuleer dat dit gebeur wanneer hul sonar in vlak water deurmekaar word, of wanneer ‘n siek walvis in die groep na die strand swem en die ander hom volg.
– Volg Nuus24 op Twitter
- AFP