455 renosters al vanjaar in SA gestroop

2012-10-16 17:00

Kaapstad – Altesaam 455 renosters is vanjaar al in Suid-Afrika gestroop, het die departement van omgewingsake bekend gemaak.

Die syfer is al klaar hoër as verlede jaar se algehele syfer.

Altesaam 448 renosters is verlede jaar in Suid-Afrika gestroop.

Die oorgrote meerderheid van die renosters is in die Kruger Wildtuin gestroop. Altesaam 272 is al hier sedert die begin van Januarie gestroop.

Die provinsies van KwaZulu-Natal, Limpopo en die Noordwes is die hardste getref en het al saam 150 renosters verloor.

Albi Modise, woordvoerder vir die departement, het gesê dat 207 mense al vanjaar in verband met renosterstropery in hegtenis geneem is.

Dit sluit in 179 stropers, 10 mense wat onwettige horings ontvang het en 18 mense wat die horings vervoer het.

– Volg Nuus24 op Twitter
 

- SAPA