27 pikkewyne deur honde doodgebyt

2012-05-10 14:22

Melbourne – Omgewingsbeamptes het Donderdag die dood van 27 pikkewyne, wat waarskynlik deur ‘n hond of trop honde by Katbaai doodgebyt is, ondersoek.

Die pikkewyne is Woensdag in die Phillip-eiland Natuurpark in die Victoria-staat, ‘n gewilde toeriste-attraksie, gevind.

“Amptenare van die departement van volhoubaarheid en wildlewe ondersoek die oorsaak van hul dood, alhoewel voorlopige ondersoeke van hul beserings in ooreenstemming is met ‘n honde-aanval,” het ‘n woordvoerder van die departement gesê.

Die kleinpikkewyn is die wêreld se kleinste pikkewynspesie en die enigste spesie wat permanent in Australië aangetref word.

Phillip-eiland is die tuiste van een van die wêreld se grootste kolonies en honderde van hierdie voëls swem elke aand na die land om na hul neste in die natuurreservaat te gaan.

Duisende mense kom elke jaar om die pikkewyn-parade, soos wat dit bekendstaan, te aanskou.

Die eienaar van enige hond wat verantwoordelik vir die aanval is kan met tot Aus$3 000 (R24 200) beboet word.

– Volg Nuus24 op Twitter

 

- Sapa - AFP