'Vakbonde móét lede se belange op hart dra'

2012-08-31 07:24

Johannesburg – Vivian Atud, ‘n ekonoom van die Vryemark-stigting, sê enige vakbond wat in die toekoms 'n belangrike rol in die Suid-Afrikaanse arbeidsmark wil speel, móét die belange van sy lede voorop stel.

Atud sê Suid-Afrikaanse werkers word al hoe meer bewus van hul regte en sal in die toekoms net nóg groter eise aan vakbonde stel.

RSG berig twee nuwe vakbonde het nou ook tot die mynwese toegetree – die Association of Mineworkers and Construction ­Union (Amcu) en die United Transport & Allied Trade Union (Utata).

Amcu ding mee met die mynwerkersvakbond Num; en Utata met vervoervakbond Satawu.

Adj.pres. Kgalema Motlanthe het vroeër 'n dringende beroep op mynhuise gedoen om die lewensomstandighede van mynwerkers te verbeter om verdere onrus ná die geweld op Marikana te voorkom.

Die adjunk-president sê onwettige stakings is onvermydelik wanneer werkers voel dat daar nie aan hul eise gehoor gegee sal word nie.

Dit kom nadat 34 mynwerkers twee weke gelede in ‘n skietery tussen stakers en polisiebeamptes gesterf het. Meer as 70 mense is in die voorval gewond.

Dit het vroeër aan die lig gekom dat aandele in die Lonmin-mynmaatskappy deur dié geweld geraak is.

Die SABC het vroeër berig die prys van platinum het tot sy hoogste vlak in byna vier maande gestyg ná die nuus dat werknemers by ander maatskappye óók salarisaanpassings geëis het.

Volg Nuus24 op Twitter