Swakker rand lok dalk buitelanders

2012-11-19 08:02

Johannesburg – 'n Swakker rand kan heelwat meer vakansietoeriste na Suid-Afrika lok, het Sake24 Maandag berig.

Dít sal egter slegs gebeur as vlugtariewe nie teen die groot tempo van die afgelope tyd bly styg nie.

Tommy Edmond, uitvoerende hoof van die toerismegroep Tourvest, het gesê die aantal internasionale toeriste wat Suid-Afrika volgende jaar besoek sal na verwagting met sowat 6% styg.

Hy het egter gewaarsku dat hoewel amptelike toerismestatistieke wys dat toeriste-aankomste na Suid-Afrika toeneem, dit nie noodwendig die geval is vir toeriste-aankomste vir vakansies nie – en dis dié syfer wat vir toerismeondernemings werklik van belang is.

Tourvest was in 2010 die gasheer vir een uit elke tien mense wat die Wêreldbeker-sokkertoernooi bygewoon het. Die groep het dit gedoen deur ooreenkomste met korporatiewe borge te sluit.

Daar word nou ook hard gewerk om dié sukses in Brasilië, wat die Wêreldbeker-sokkertoernooi in 2014 aanbied, te herhaal. Edmond het gesê daar reeds ooreenkomste met drie van die vernaamste klante in Brasilië gesluit.

– Lees hier meer.

– Volg Nuus24 op Twitter.