Storm dreig oor 'krisis' in pluimvee-bedryf

2012-11-27 10:17

Kaapstad – Werkers by die County Fair-hoenderfabriek in Stellenbosch sê hulle is met verfbal-gewere geskiet terwyl hulle betoog het, het Cape Argus berig.

Die werkers beweer veiligheidswagte het op hulle geskiet terwyl hulle Maandag buite die Muldersvlei-kantore betoog het.

Sowat 100 mense het op die R304 buite die kantore saamgedrom. Hulle het stokke, sambokke en plakkate vasgehou terwyl hulle aan 'n optog deelgeneem het.

Die groep eis ‘n weeklikse salaris van R1 500. Hulle beweer hulle verdien tans ná aftrekkings sowat R499 per week.

“Ons het vanjaar niks oor verhogings gehoor nie. Ons het niks nie en hulle is stil,” het ‘n werker gesê.

Theo Delport, direkteur van pluimvee by Astral Foods, het aan die koerant gesê die maatskappy moes kostes sny om kop bo water te hou.

“Die hoenderbedryf is op die oomblik in ‘n krisis en vaar nie baie goed nie. Dit gaan als oor bekostigbaarheid...”

Hy ontken dat die veiligheidswagte op werkers geskiet het.

Volg Nuus24 op Twitter

- SAPA