Vakbonde bespreek boere se aanbod

2013-01-13 08:02

Johannesburg – Vakbonde het tot laatnag in die Paarl samesprekings gevoer oor die loonaanbod van R105 per dag wat sommige Wes-Kaapse boere aanbied, het die SABC berig.

Duisende plaaswerkers eis R150 per dag, wat byna dubbeld die huidige minimumloon van R69 is.

Werkers het vroeër die week hul staking hervat. Talle mense is deur rubberkoeëls beseer toe duisende plaaswerkers die polisie uitgetart en met klippe bestook het.

Ongeveer 6 000 werkers van De Doorns het aan die staking deelgeneem. Betogings het ook in Grabouw en Wolseley plaasgevind.

Sapa het vroeër berig stakende plaaswerkers het ook 'n joernalis se motor omgekeer en dit aan die brand gesteek. Die voertuig, wat aan Independent Newspapers behoort het, is deur die Cape Times-joernalis Xolani Koyana gebruik.

Die verslaggewer het gesê hy moes uit sy motor na veiligheid getrek word nadat betogers dit met klippe bestook het.

Hy en 'n ander joernalis was in die voertuig toe betogers hulle omsingel het, en aangesê het om die gebied te verlaat.

Die openbare uitsaaier berig boere in die gebied sê die gewelddadige staking hou 'n groot bedreiging in vir Suid-Afrika se beeld as belangrike uitvoerder van gehalte vrugte.

Volg Nuus24 op Twitter