Regering vergader met Lonmin-bestuur

2012-08-20 13:05

Marikana – Collins Chabane, minister in die presidensie, en ‘n inter-ministeriële komitee het met Lonmin se bestuur by die myn vergader.

Chabane se komitee sal die familielede van die slagoffers, wat tydens die gewelddadige botsings afgemaai is, bystaan.

Die vergadering kom nadat 34 mynwerkers Donderdag in ‘n skietery met polisiebeamptes gesterf het.

Eyewitness News berig Chabane, Susans Shabane (minister van mynwese) en Nathi Mthethwa (nasionale polisiehoof) het agter geslote deure met die myn se bestuur vergader.

Die betogings het vermoedelik te make met mededingendheid tussen die National Union of Mineworkers (Num) en die Association of Mineworkers and Construction Union (Amcu) oor erkenningsooreenkomste by die myn. Werkers wou ook meer betaal word.

Lonmin het intussen ‘n ultimatum aan die werkers gestel. Die maatskappy het vir die onwettige stakers gesê hulle sal afgedank word indien hulle nie Maandag by die werk opdaag nie.

Die SABC berig sommige werkers het wel teruggekeer werk toe.

Sapa berig onwettige staking – wat verlede Vrydag begin en tot 44 sterftes gelei het – het bedrywighede by die wêreld se derde grootste platinum-myn in Rustenburg, Noordwes, tot stilstand geruk. 

Volg Nuus24 op Twitter