Produksie by Marikana-myn steeds gestaak

2012-08-21 12:35

Marikana – Produksie by Lonmin se platinum-myn in Marikana in die Noordwes sal nie voortgesit word totdat ‘n aansienlike aantal stakende mynwerkers terug keer werk toe nie.

Só het Mark Munroe, die maatskappy se uitvoerende adjunk-president vir my mynwese, gesê.

Die myn het ‘n ultimatum aan sowat 3 800 stakende rotsbrekers gestel. OFM berig die mynwerkers moes teen 07:00 terug keer werk toe indien hulle nie ‘n tugsaak wil hê nie.

Munroe sê sowat 30% van die werkers het Maandag vir werk opgedaag.

Hy sê die myn se bedrywighede sal weer begin sodra genoeg werkers teenwoordig is en die nodige veiligheidsprosedures voltooi is.

Volgens die adjunk-president sal ‘n loonverhoging van 9% vir rotsbrekers in Oktober vanjaar in werking tree, het die radiostasie berig.

Sapa het vroeër berig die onwettige staking – wat verlede Vrydag begin en tot 44 sterftes gelei het – het bedrywighede by die wêreld se derde grootste platinum-myn tot stilstand geruk. 

Volg Nuus24 op Twitter