Plaaswerkers aangesê om voort te gaan met staking

2013-01-21 09:25

Kaapstad – Plaaswerkers in die Wes-Kaap is aangemoedig om aan te hou staak totdat daar aan hul eis vir 'n hoër loon gehoor gegee is, is Maandag berig.

Die vakbond Bawusa het Sondag aan werkers gesê indien hulle terugkeer werk toe, is daar 'n moontlikheid dat boere nie sal ingee nie, het die Cape Times berig.

"Ons doen 'n beroep op plaaswerkers om nie terug te keer werk toe nie. Laat ons eerder 'n paar dae ly as wat ons vir ewig ly," het Nosey Pieterse, sekretaris-generaal van die vakbond, in Avian Park naby Worcester gesê.

"Ons sal die stryd binnekort wen, maar almal moet saam met ons veg, want dit sal almal bevoordeel."

Pieterse beweer boere reis na kleiner dorpe in vragmotors om werkers te vind.

Hy het gesê 'n vreedsame staking word Maandag in Avian Park en Touwsrivier beplan.

Die staking, wat verlede jaar begin het, is in Desember opgeskort, maar is byna twee weke gelede in verskeie dorpe regoor die provinsie hervat.

Die Food and Allied Workers' Union (Fawu) het volgens berigte Sondag sowat 500 van sy lede in De Doorns aangemoedig om terug te keer werk toe, maar slegs indien hulle 'n hoër loon betaal word.

Kathisa Masemola, hoofsekretaris van dié vakbond, het werkers gevra om Maandag vreedsaam te betoog.

Die vakbond het verlede week aangekondig dat hy Donderdag na die De Doorns-polisiekantoor sal opruk om te vra vir 'n staking sonder geweld van albei kante.

Letsekang Thokoene (25), wat in 'n spaza-winkel gewerk het, is verlede Maandag dood toe hy na bewering in De Doorns met rubberkoeëls geskiet is.

Dieselfde dag het 'n rubberkoeël 'n 10-jarige meisie in die oog getref.

Die Suid-Afrikaanse Menseregtekommissie (SAMRK) ondersoek meer as 20 klagtes van brutaliteit teen die polisie, boere en privaat sekuriteitswagte.

Nathi Mthethwa, minister van polisie, het Vrydag gesê 26 polisiebeamptes is beseer tydens betogings in De Doorns.
      
– Volg Nuus24 op Twitter

- SAPA