Petrolprys onder vergrootglas

2012-11-15 10:15

Kaapstad – 'n Moontlike aanpassing van die formule wat gebruik word om die basiese petrolprys te bereken kan goeie nuus vir Suid-Afrikaanse verbruikers inhou – maar dis nog lank nie seker of dié aanpassing gemaak gaan word nie.

Die departement van energie stel ondersoek in na ’n bobetaling van 15% op die verskeping van brandstof na Suid-Afrika wat moontlik uit die sanksiejare spruit, berig Sake24.

Dié heffing word vandag nog deur verbruikers betaal.

Robert Maake, hoofdirekteur vir brandstofbedrywighede van die departement, het Dinsdag aan die portefeuljekomitee oor energie gesê dié bobetaling word ondersoek as deel van sy hersiening van die wyse waarop die basiese brandstofprys bereken word.

Sowat ’n kwart van die petrolprys bestaan uit dié en ander belastings en heffings, insluitend heffings vir die Brandstof- en Padongelukkefonds.

Die basiese brandstofprys is gegrond op wat dit ’n Suid-Afrikaanse invoerder sou kos om petrol van ’n internasionale raffinadery te koop en dit na Suid-Afrika te vervoer. Heffings word dan by die basiese brandstofprys gevoeg. Dit bedra sowat 58% van die prys.

Maake het benadruk die departement kon nog nie vasstel om watter rede die 15%-premie in die hersiene basiese brandstofprys van 2003 ingesluit is nie. Indien dit wel onnodig is, kan dit die formule verander waarop die brandtofprys bereken word.

Kenners stem egter nie saam oor die geldigheid van die heffing nie.

– Lees hier meer.

– Volg Nuus24 op Twitter.