Petrolprys kan wéér skerp styg

2013-02-24 14:50

Johannesburg – Die departement van minerale en energie sal na verwagting volgende week 'n petrolprysverhoging van minstens 75c per liter aankondig, berig Fin24.

Dít volg nadat die daaglikse petrolprys se onderverhaling op 21 Februarie 74.974c/l per liter was nadat dit op 29 Januarie 100.661c/l bereik het.

'n Onderverhaling beteken dat die basiese petrolprys, wat gebaseer is op die daaglikse produkprys en verhandelingskoers, meer is as die prys wat gebruik is in die berekening van die maandelikse kleinhandelprys van petrol.

Die verandering in die daaglikse petrolprys in Januarie was grootliks weens die verswakte rand, terwyl die groot faktor in Februarie stygende internasionale produkpryse was.

Volgens die berig kan die departement van minerale en energie die petrolprys met sowat 75c per liter op 6 Maart verhoog, mits die daaglikse onderverhaling naby die Februarie-vlak bly. Die kleinhandelprys van diesel kan met tot 53c per liter styg.

Die petrolprys het verlede maand met 41c per liter gestyg.

– Volg Nuus24 op Twitter