Nuwe wending in saak teen Fidentia-baas

2012-12-13 12:25

Kaapstad – J Arthur Brown, voormalige hoof van Fidentia, sal nie meer in die Kaapstad-streekhof verskyn op die aanklagte teen hom nie.

Regter Anton Veldhuizen het Donderdag beslis dat die diefstalaanklagte teen hom nou by sy saak in die hooggeregshof ingesluit sal word.

Brown is in 2007 in hegtenis geneem en staan tereg op vier aanklagte van bedrog, twee van korrupsie, twee van diefstal, en een van geldwassery.

Die staat voer aan dat hy 'n piramideskema bedryf het en beleggers se geld gebruik het vir persoonlike gewin. Die geld is na bewering gebruik om onder meer luukse voertuie en strandhuise aan te koop.

Die saak is tot 28 Januarie uitgestel.

"Op die 28ste sál hierdie saak voortgaan. Alles moet in order wees en daar moet geen verdere vertragings wees nie," het Veldhuizen gesê.

– Volg Nuus24 op Twitter.

- SAPA