Mynwerkers afgedank ná onbeskermde staking

2012-12-10 09:34

Johannesburg – Coal of Africa het die helfte van die werkers by sy Mooiplaats­myn afgedank weens 'n onbeskermde staking, het Sake24 Maandag berig.

Altesaam 178 werkers by Mooiplaats is in die pad gesteek. Die maatskappy se bestuur het intussen gesê die staking bedreig die bestaan van dié myn.

Daar is reeds voor die staking met ’n kostebesparingsveldtog begin.

Nog onderbrekings van produksie sal ’n “baie ernstige uitwerking op die volhoubaarheid van Mooiplaats hê en sal waarskynlik op werkverliese uitloop”.

Die werkers is Donderdag afgedank ná hulle Maandag met 'n onbeskermde staking begin het.

“Die stakers se protes was teen die skorsing van vier van hul kollegas wat protesreëls verbreek het tydens die vorige staking in Oktober," het John Wallington, uitvoerende hoof van CoAL, volgens Sake24 gesê.

– Lees hier meer.

– Volg Nuus24 op Twitter.