Mpumalanga wil werk skep, korrupsie uitroei

2013-03-02 09:48

Johannesburg – David Mabuza, premier van Mpumalanga, het gesê dié provinsie se regering beplan om teen 2020 meer as 700 000 werksgeleenthede te skep, het RSG Saterdag berig.

Mabuza het die aankondiging in sy provinsiale rede gedoen.

Die provinsie het met sy uitgebreide openbare werkeprogram in die eerste ses maande van die 2012/2013-boekjaar glo reeds meer as 40 000 werksgeleenthede geskep.

Mabuza het ook aangekondig dat staatsamptenare in die toekoms nie toegelaat sal word om sake met die regering te doen nie.

“As amptenare in die sake-wêreld betrokke wil raak, moet hulle bedank. Hulle is hier om diens aan die gemeenskap te lewer,” het hy volgens Beeld gesê.

Die verbod op buitewerk is ingestel om korrupsie uit te roei, het Mabuza verduidelik. Tugstappe is die afgelope jaar teen 334 regeringsamptenare gedoen, en klagte van bedrog en korrupsie is teen 56 amptenare aanhangig gemaak.

Die oorgrote meerderheid van dié amptenare is afgedank of gedemoveer.

– Lees hier meer.

– Volg Nuus24 op Twitter.