Melkkrisis dreig in Vrystaat

2013-02-08 07:15

Bloemfontein – Die produsentprys van melk sal aansienlik verhoog moet word om 'n ramp in die Vrystaat af te weer en om die volhoubaarheid van die streek as melkproduksiegebied te verseker, het die Melkprodusente-organisasie in die provinsie gesê.

Dít kom te midde van suiwelboere in die provinsie wat besig is om hul kuddes te verkoop omdat die plaaslike produksiekoste van melk die prys daarvan oorskry.

Bernard Maree, voorsitter van die Vrystaatse Melkprodusente-organisasie, het Donderdag gesê daar is kommer dat 'n groot aantal suiwelboere nie die huidige lae produsentepryse sal oorleef nie.

"Verskeie boere het hul kuddes verkoop en baie ander verkope kan dalk volg."

Hy het gesê plaaslike boere kan weens stygende kostes nie verder teen 'n verlies produseer nie.

Dit sluit in die verhoging van veeartskoste met tussen 10% en 15%, die voorgestelde elektrisiteitsverhogings en 'n verhoging in die minimumloon van 52%.

Suiwelboere in dié provinsie het 'n laer melkprys in vergelyking met ander streke, wat die gevolg is van 'n nie-markverwante  prysbesnoeiing in Junie.

Maree het gesê die verlaging in die melkprys sal vir 'n ruk 'n negatiewe uitwerking hê op boere in die Vrystaat.
       
– Volg Nuus24 op Twitter

- SAPA