Lonmin wil 'binne strukture' werk

2012-09-20 10:09

Johannesburg – Die Lonmin-platinummyn hoop om voortaan “binne strukture en reëls” met werkers te kommunikeer, het sy waarnemende uitvoerende hoof gesê.

“Ons moet werk om die vertroue weer op te bou en om prosesse in plek te stel sodat werkers dit sal goeddink om deur hul vakbonde te werk,” het Simon Scott aan Business Day gesê.

“Ons gaan binne strukture en reëls optree en dit is nie ons bedoeling om voort te gaan om direk met werkers te praat nie.”

Lonmin-werkers het Donderdagoggend teruggekeer werk toe ná ‘n staking van 42 dae, waartydens 46 mense dood is.

Die staking het geëindig nadat die maatskappy die werkers ‘n salarisverhoging van 22% aangebied het, wat gedeeltelik deur ‘n werkerskomitee onderhandel is.

Business Day berig dat Scott huiwerig is om meer besonderhede te gee oor die volle uitwerking van Lonmin se verhoogde loonaanbod.

“Die algehele loonverhoging wissel tussen 11% en 22% , so die koste is êrens tussen dit... Die langtermyn grondbeginsels van platinum is uitstekend, maar in die korttermyn gaan baie noukeurige bestuur nodig wees weens die verhoogde arbeidskoste,” het hy gesê.

– Volg Nuus24 op Twitter
 

- SAPA