Lonmin sluit skag, kanselleer arbeidskontrak

2012-09-17 15:28

Johannesburg – Lonmin sal vir die afsienbare toekoms slegs instandhoudingswerk by sy K4-skag doen en het ‘n kontrak met Murray & Roberts, wat sowat 1 200 arbeiders verskaf, beëindig, het die maatskappy Maandag gesê.

'n Staking by dié myn duur steeds voort.

Die maatskappy sê hy het op 26 Julie reeds aangekondig dat hy in die lig van swak pryse 'n deel van die kapitaalbesteding by sy K4, Hossy- en Saffy-skagte in die Rustenburg-omgewing sal opskort in 'n poging om jaarlikse kapitaalbesteding vir 2013/14 na $250 miljoen (sowat R2 miljard) per jaar te verminder.

“Lonmin wil ook vandag aankondig dat hy sy K4-skag slegs in stand sal hou as deel van daardie hersiening van kapitaalbesteding,” het die maatskappy in ‘n verklaring gesê.

“Die maatskappy het vandag kennis gegee om sy kontrak met Murray & Roberts van 17 Oktober 2012 te beëindig. Dit is die kontrakteur wat sowat 1 200 werkers by die K4-skag verskaf.”

Produksie het tot stilstand gekom toe werkers by Lonmin se platinummyn in Marikana op 10 Augustus begin staak het. Hulle eis 'n maandelikse loon van R12 500.

Die staking het intussen na ander myne in die omgewing versprei.

– Volg Nuus24 op Twitter
 

- SAPA