Krag in SA op 'n naaldpunt
2013-02-22 07:00
Aanwysers
| Rand/$ |
 | 9.40 | -0.96% | Goudmynesektor |
| Rand/£ |
| 14.27 | -0.3% |  1365.50 | 0% |
| Rand/€ |
| 12.07 | -0.61% | Alle aandeleindeks |
| Goud/oz | | 1360.10 | -0.42% | 41413.44 | 0% |
Pretoria. – Kragvoorsiening in Suid-Afrika is hoogs onseker nadat eenheid 1 van die Koeberg-kragstasie in Kaapstad vroeër vandeesweek ophou werk het, berig Sake24.
Die reserwemarge was Donderdagaand net 1,1% (365 MW). Die internasionale maatstaf is dat die opwekkingsvermoë die vraag met minstens 15% moet oorskry om voorsiening te maak vir onbeplande onderbrekings weens eenhede wat breek.
Die beskikbare opwekkingsvermoë was Donderdagaand 31 803 MW, insluitende dié van die peperduur gasturbines. Die verwagte kragvraag was 31 438 MW en 7 603 MW se opwekkingsvermoë was weens die onderbrekings nie beskikbaar nie.
Die Koeberg-eenheid het outomaties gaan staan weens ’n fout op die elektriese skakelbord.
Intussen is die invoer van elektrisiteit van Cahora Bassa in Mosambiek met die helfte verminder tot 650 MW as gevolg van die skade wat die vloede in Limpopo vroeër aan een van die kraglyne aangerig het.
Eskom sê die werkverrigting van sy eie vloot kragstasies is wisselvallig omdat die druk op kragvoorsiening die beplande instandhoudingswerk wat nodig is om betroubaarheid te verseker, onmoontlik maak.
“Dit is soos ’n motor wat nie gereeld versien word nie en dan onverwags breek, wat ’n mens dan dwing om die herstelwerk in elk geval te doen. Dit word ’n bose kringloop,” het Hilary Joffe, Eskom-woordvoerder, gesê.
Eenheid 1 van Koeberg sal na verwagting “binne dae eerder as weke” weer op dreef wees.
Die herstelwerk aan die Cahora Bassa-kraglyn is vertraag omdat die riviere eers moes sak. Dít sal hopelik binne enkele weke herstel wees, het Joffe gesê.
– Volg Nuus24 op Twitter
