Kommer oor prysstygings, vet salarisverhogings

2012-12-04 08:16

Johannesburg – Munisipaliteite wil in die huidige boekjaar gemiddeld 18,8% méér dienstegeld by hul inwoners hê, toon ‘n samevatting van munisipale begrotings vir die huidige boekjaar.

Die verslag, wat op die geldsake van al 278 plaaslike owerhede fokus, is Maandag deur die nasionale tesourie gepubliseer, en bied ‘n blik op die moontlike negatiewe uitwerking van prysstygings.

Plaaslike owerhede voorsien volgens die dokument onder andere dat hulle slegte skuld met byna 52% kan styg weens inwoners wat nie dienste kan betaal nie.

Munisipaliteite begroot vir byna R10,5 miljard se slegte verbruikerskuld in dié boekjaar.

Boonop plaas 'n styging van 17,3% in personeeluitgawes ekstra druk op begrotings. Dié styging kan dui op ekstra personeelaanstellings of salarisverhogings. Die tesourie waarsku in die dokument uitdruklik teen dié stygende personeelkoste.

Die ekonoom Mike Schüssler het volgens die dagblad Beeld gesê munisipale koste is buite beheer en raak toenemend ’n remskoen aan die ekonomie.

– Lees hier meer.

– Volg Nuus24 op Twitter.