Harmony-myn steeds gesluit ná stakings

2013-01-04 11:31

Johannesburg – Harmony Gold het besluit om die heropening van sy Kusasalethu-myn naby Carletonville ná die fesseisoen uit te stel terwyl die myn se finansiële en operasionele status hersien word ná 'n rits stakings, het 'n berig Vrydag gelui.

The Star het berig dat ongeveer 200 mans Donderdag buite die hoofingang van die myn gesit het omdat hulle nie geweet het bedrywighede by die myn is tot verdere kennisgewing opgeskort nie.

Marian van der Walt, 'n woordvoerder vir Harmony, het gesê kennisgewings oor die tydelike sluiting is deur die media versprei en vakbonde is daarvan in kennis gestel.

Sy het bygevoeg dat werkers op 21 Desember huis toe gestuur is en aangesê is om daar te bly tot verdere kennisgewing. Werknemers is in kennis gestel dat hulle hul basiese salarisse sal ontvang terwyl hulle by die huis is.

Meer as 1 000 werknemers van die maatskappy het in Desember aan 'n ondergrondse staking deelgeneem, en het geëis dat werknemers wat afgedank is, weer in diens geneem word.

– Volg Nuus24 op Twitter.

- SAPA