Gold Fields-werkers keer terug werk toe

2012-09-01 14:31

Johannesburg – Werkers wat verlede week by Gold Fields se KDC-myn begin staak het, sal Maandag terugkeer werk toe ná 'n geskil oor 'n begrafnispolis, het die National Union of Mineworkers (NUM) Saterdag gesê.

"Lede wil nie hê die myn moet 'n verpligte begrafnisskema implementeer nie, hulle soek opsies," het Lesiba Seshoka, woordvoerder, gesê.

Die mynbestuur het Vrydagaand ingestem dat hulle die polis vrywillig sal maak en werkers sal na verwagting ná die naweek terugkeer werk toe.

Franz Stehring, eenheidsbestuurder van die vakbond Uasa, het gesê die begrafnispolis is tussen die vakbond en die myn onderhandel.

'n Totaal van R69 sou van alle kategorie drie tot agt werkers se salarisse afgetrek word vir die polis, "ongeag of hulle dit wou hê of nie".

Dit was van toepassing op werkers wat lede is van ander vakbonde en dié wat nie geaffilieer is nie, het Stehring gesê.

Uasa het verlede week in 'n brief aan die mynbestuur gesê hy is gekant teen dié besluit en het Vrydagoggend 'n "nie-amptelike" reaksie ontvang dat werkers kan kies of hulle die dekking wou hê.

Gold Fields het Vrydag in 'n verklaring gesê sowat 12 000 werkers het Woensdag met 'n onwettige staking begin.

Peter Turner, hoof van Gold Fields Suid-Afrika, het gesê hoewel die werkers se eise nie duidelik was nie, het die bestuur gewerk om 'n oplossing vir die kwessie te vind.

'n Woordvoerder van die myn kon nie Saterdag vir kommentaar bereik word nie.

– Volg Nuus24 op Twitter

- SAPA